Wrth i Gary Speed arwain tîm Cymru allan ar faes Red Star Belgrade er mwyn herio Serbia & Montenegro ym mis Awst, roedd ymdrechion apêl cefnogwyr pêl-droed Cymru, Gôl!, yn golygu fod 35 o blant amddifad o gartre Dom Za Decu Bez Rodutelja yn y ddinas yn cael gwylio’r gêm fawr.

Yn ogystal a phrynu tocynnau i alluogi’r plant i gael profi’r wefr o wylio gêm yn fyw, roedd Gôl! wedi trefnu i ymweld â’r cartref er mwyn cyflwyno nwyddau â gasglwyd dros y misoedd diweddar.

Ymysg yr anrhegion oedd pyjamas wedi eu cyfrannu gan gwmni Aykroyds o’r Bala, crysau-T a brwshus dannedd gan raglen blant Uned 5, kits pêl-droed gan glybiau Merthyr Tydful, CPD Merched Caerdydd ac Everton, fideos plant gan BBC Cymru, tegannau meddal gan Grwp Help Llaw Bow Street ger Aberystwyth a phâst dannedd gan ddeintyddfa B.K. Humphries yng Nghaernarfon.

Roedd criw o Gôl! eisioes wedi ymweld â’r cartre ym mis Ebrill diwetha er gwaetha’r ffaith fod y  gêm wreiddiol wedi cael ei gohirio oherwydd llofruddiaeth Prif Weinidog Serbia. Cymaint oedd y croeso gafwyd gan drigolion a staff y cartre bryd hynny, penderfynwyd ailymweld â’r cartre er mwyn danfon mwy o nwyddau ac arian, yn ogystal a dosbarthu tocynnau i’r gêm.

Wedi cyflwyno'r anrhegion, roedd bechgyn y cartref yn awyddus i ddangos eu doniau pêl-droed, ac i fod yn onest, nid oedd yr hogia'n meddwl llawer o obeithion y cefnogwyr.
"Rydych chi i gyd rhy dew," meddai un bachgen bach powld. "Byddwn ni yn eich chwalu chi."
Ac yn wir, roedd y plant yn llawer rhy dda i'r Cymry.

Gyda'r rhan fwyaf o hogia Bala yn penderfynu eu bod yn dioddef gormod o sgil effeithiau'r noson gynt i chwarae, roedd ein carfan yn un fechan iawn, a bu rhaid i ni ddibynu ar ddoniau sgorio Tommie Collins yn ogystal â gobeithio bod ein golwr, Keith Humphries o'r Bala, yn fodlon neidio ar goncrete! 

Ac o'r eiliad bu rhaid i ni alw ar Gary Pritchard i'r maes fel eilydd, roedd yn amlwg fod y Cymry mewn trafferthion enbyd!